騰騰鎮: 2010.03

2010-03-31

蕃茄又大一歲

3月24日係蕃茄4x歲生日，當然要同佢賀下啦。之前問過幾位朋友意見，邊度食"暴肥"好食，最後得出結論Island Shangri-La既Cafe Too仍然唔錯，所以決定去呢間。

對上一次去呢間Buffet應該係03年，記憶中水準係唔錯，而且好爆，但今次去，居然唔Full喎，仲唔Full得幾離譜添。

成7點半都冇乜人，陰公

呢個龍蝦山係招牌貨，但蕃茄話鹹，不過有呢樣，

就冇蠔食架喇

我每次食Buffet都鍾意黎個湯先

唔好睇少呢幾個蓋，好重呀

壽司比較弱，冇乜得揀

燉豬骨湯同蝦餃

熱葷

個豆卜未熟都俾得人先好

甜品角，幾多款呀，呢PART幾好

Crepes + Marshmallow，內有香芋同呍呢嗱雪糕

總括黎講D野食叫OK啦，唔算驚喜，不過真係食得好飽，算係盡興而回呀!

是日$438一位 x 2，包杯drink，有恒生咭有85折喎，算OK抵!

留倩影

突然收到消息，一位剛搬來我公司附近工作的親密戰友，在lunch時間之前突收到公司要Terminate佢個contract，原因係其所屬既附屬公司唔再搞一D選美Event!

收到消息後，我個心好酸，唔係因為戥佢冇左份工，更唔係因為冇人陪我食飯，而係點解一個對選美呢方面咁有talent既人，公司都可以放棄，寧願俾一班唔投入唔志在唔專業既人去搞，簡直係資源錯配，捉到鹿唔識脫角。

在此希望我這位朋友能夠快快收拾心情(其實佢就冇乜野)，再喺第二個領域發揮所長啦!

做人係咁架喇! (朱虹腔)

2010-03-26

泰難忘之旅 ─ Day 5

話咁快又到行程尾聲，嗚嗚嗚.....

由於班機係下午兩點，所以其實朝早11點要由酒店出發，都冇咩可以做，食個早餐執下野又要起程喇。

食個輕Kan早餐

雖然買左新泳褲，但我仍堅持冇落水

又check-in飛返香港，大家都唔捨得

入閘後食多餐先，但此刻我已經非常冇胃口，作悶作病

最後我食件三文治送藥就算

返到香港喇，好凍呀喂 >_<

落到機場原來香港得8度，又著唔夠衫，返到屋企又暈又成身攰奶奶，占寒占凍。原來燒到102度，慶幸假期尾聲先發病，總算冇破壞大家既興致。但我呢個新年假期剩低呢幾日就響床上面渡過。

2010-03-25

泰難忘之旅 ─ Day 4

行程第四日，仍然係hea玩hea行hea食。

團友DL 2月22日生日，所以我地特登book左 Oishi Buffet，俾個little surprise佢! 呢間Buffet係MOS推介，一食可以食4個鐘，岩哂d鍾意打「持久戰」既為食鬼。Buffet主打壽司同鐵板燒，當然中式熱葷同西式甜點亦任君選擇，反而泰式野冇乜喎。

呢d鈕仔係用黎拎返d Teppanyaki

好多壽司揀呀，MOS一臉滿足

綠色燒賣，嚇死人咩

燒物，個人認為粟米最好味

由於未有準備蛋糕，我地索性叫侍應將擺係

吧枱既蛋糕成個拎黎

食飽後下一站當然係繼續Shopping啦，都差唔多要走所以大家嚷著要去買手信，而我地就揀左去曼谷大型超市之一Big C。這間位於World Trade附近的Big C，樓高兩層，乜鬼都有得賣架。

入去喇

黃字呢句係咪泰文恭喜發財呢下

RC & MOS誠意推介呢款餅，我都買左，幾甜架

去呢度買紅雞蛋唔駛自己染

d水咁高點拎呢下

連office file都有得賣

買到滿載而歸，都係一千Baht有找

行到咁攰食個donut真係人生一大樂事

買完野真係超攰，大家建議去揼骨，所以黎左呢間Health Land Spa & Massage。呢間Spa都幾大，自己一座獨立建築物，有五六層架，而且都幾爆，我地晨早book都要六點半先有位。

去到都仲要等9個字呀，大家各打發時間

咦，Tung，你呢個飲法好慳水慳力喎

由於呢個場好近酒店，大家揼完拎住一抽二lun返酒店，個個疲態畢露，索性響酒店裡面既餐廳用膳就算。之後再去Sala Daeng紅燈區逛逛，是次泰國之旅主要旅程就此完畢。唔該哂!

真係紅燈區，冇呃你地架

2010-03-24

泰難忘之旅 ─ Day 3

到了第三日，又係大年初一加情人節，大家梗係早早起身高高興興咁出去行個大運啦。點知一朝早走黎個頗氣人既小插曲。

話說因為第四日我地想去位於Siam Centre(以為)既Oishi Buffet度慶祝友人生日，所以今日諗住去嗰度親身訂枱，然後再周圍食野閒逛。本來大家講好坐BTS去，因為只得3個站，但一出酒店，有團友嫌BTS站遠，建議坐的士前往，而我們8人要分兩部的士。但那團友一截了部的士，便跟其他3人快快手上左車，冇講清楚在邊度等。冇法啦，咁我地等二部的士。點知在烈日下截了約10分鐘，的士係有，但一係唔知我地講乜，一係又唔想去(原來嫌塞車)，所以眾人嬲嬲地索性去搭BTS。點知一出路口原來個BTS Chong Nonsi站就係呢度，你話激唔激死。

好啦，我地好快手就去到Siam站(據其他踏的團友透露佢地塞左約半個鐘)，去到諗住搵呢間Oishi Buffet，喺嗰度等佢地，點知又搵唔到喎。Siam Centre唔算大，我地發散哂搵都搵唔到，呢度又搞左半個鐘，而我地咁岩個個手提又冇Roaming (我本來有，但張Sim Card換機時跌左)，所以跟令一Group人完全聯絡唔上。大家搵到冇哂興又餓，惟有自己食D野先，點知一坐低已經見到「的士Group」班人行過。原來佢地在Oishi Buffet門口一直等我地，而呢間Buffet原來響Siam Discovery，並非Siam Centre，真係邊個俾D流料我地呀。

算喇算喇，既然搵得返就算，新正頭大家咪勞氣，笑下啦!

食返D靚壽司消下悶氣

D牛肉粒，韌到你阿媽唔認得

食完Lunch，最好就係周圍行下。其實Siam站的Shopping Mall分Siam Centre、Siam Discovery、Siam Paragon三個，當中以Siam Paragon最大，賣既野亦最貴，好多名牌子都有分店喺度架。所以保安特別嚴密，要過Censor機同俾security bag-check先入得架。

噴水池裡面有張櫈俾大家坐，你都去坐下啦

啋，新正頭掛藍燈籠! 呢個裝飾真係曇花一現，我地第二日去，

所有裝飾已經拆哂，平時又唔見泰國人咁efficient喎

小心踩Dog X

之後我地行去鄰近既BKK商場，呢個商場走大眾化路線，

其實有少少似香港既聯合廣場呀，不過當然BKK大好多啦

呢間飲奶奶好好味架

呢間donut shop唔駛咁Hard-sell情人節卦

出面有人雜耍慶祝新年，嘩咁高好牙煙!!

泰國都興呢家野喎

之後大家等的士去下一站，等車時遇見以下奇景，四位六呎以上既老外搭架

小型篤篤! 佢地爬上車時搵圍攝既情景，令我諗起歡樂滿東華一班藝員爬上一張細枱上

Babylon係曼谷好出名既「會員俱樂部」，睇下大家幾期待入去「玩」

是晚食左餐超唔掂既餐廳，所以冇乜想寫。之後我地去左會員必去勝地"DJ Station"。呢個場集幾個Disco於一身，每晚11點亦會有人妖騷睇，佢地扮相維肖維妙，而且表情生鬼令人捧腹大笑，所以不少人都趕入去捧場!

TT既企姿似唔似花樣年華先

是夜主要會合剛到步既友人MOS & RC，齊齊Fing完出黎食粉

名副其實既「炸蜢仔」，你食埋我份

玩下食下又點幾，係時候返酒店休息喇。

2010-03-22

港姐變亞姐?

點先而家，搞到咁!!

【on.cc專訊】香港小姐為首次海外招募舉行記者會，劉倩婷、李姿敏等楊思琦等前港姐齊齊出席，無綫高層何麗全表示今屆會有新安排，年齡限制會稍為放鬆，將以往上限25歲上調至28歲以下，有身份證即可參加，毋須香港永久居民，而有模特兒合約在身者亦可以參加，何麗全否認放鬆限制是與近年港姐質素被批評有關，坦言想吸引更多靚女參加。

即係點? 有模特兒合約在身亦可選我可以接受，畢竟呢個只係無線既商業政策問題，佢搞得掂就OK，但年齡25以上都可以?? 現在國際選美大多設定年齡上限係23-26，即係分分鐘選個港姐出黎冇得出去選!! 非香港永久居民仲離譜，港姐不嬲標榜參加既女仔係熟悉香港既香港人，而家搞到咁，真係連本身優勢都冇埋，嘥氣!!! 咁同亞姐有咩分別喎!

諗呢條橋既真係唔該拖出去斬! 嬲-ing!!!

2010-03-21

泰難忘之旅 ─ Day 2

哇哈哈，由於之前屋企部腦壞左，搞到呢個泰難忘之旅第二集遲遲出唔到街，真係見諒見諒! 我會盡我所能快快搞掂成個遊記架喇。

到左Day 2，其實先算係真真正正既足日遊覽。一朝早梗係要試下呢間餐廳既早餐啦，以我呢個懶訓鬼，去親旅行通常都係第一日會食酒店早餐，之後幾日都係訓到早餐時間過哂先捨得起身。但今次旅行就可以食足4日, 點解呢? 因為如果你隔離嗰個朝朝一早就起身梳洗兼換好哂衫然後不斷"哦"你叫你陪佢落去食早餐，咁又點會miss喎!!!!!

好眼訓呀仲 zzzzzzzZZZZZZZ

原來其他房既團友已經差唔多食完添，真慚愧

餐廳唔算大，食物種類亦不多

我最like一路飲橙汁一路飲奶

泰國人d食物portion出名細，估唔煎隻蛋都細過人

食完早餐，大家都好興奮咁想仆到出去行下，我地第一站係曼谷著名旅遊點翟度翟。呢個跳蚤市場只係逢星期六同日先開，而且出名"熱到溶"，所以揀早D去希望冇咁熱。

我地搭自由行旅客甚為喜歡既交通工具BTS前往。BTS鐵路系統係曼谷市內主要既集體運輸工具，但佢歷史唔算好"悠久"架咋，99年尾先通車，以大城市黎講算好遲先有市內鐵路。雖然BTS已經過左佢10歲生日，但曼谷交通仍然係混亂擠塞不堪，真難想像99年前曼谷人係點樣周圍去架呢.....

買飛先

車到喇，寫咩呀架車

呢位團友，個鏡頭響呢邊呀

搭到去綠色線最尾一個站摩切(Mo Chit)，就到翟度翟喇! 翟度翟又名JJ Market (因有譯音寫成JatuJak)，1982年已經有架喇，現為全泰國(有些甚至話係全世界)最大既跳蚤市場。分為27個區，立立雜雜乜鬼都有，衣服鞋襪唔在講，又有傢俬、工藝品、園藝、食物、書籍、古董、甚至活生生既貓貓狗狗到嚇人既珍禽異獸都有，有說唔停咁行哂所有舖頭要4個鐘頭，大家可以想像有幾大啦!

我大大話話都黎過5-6次翟度翟，不過行黎行去都係1-5區附近，驚行得太入唔識出返黎呀，嘻!