我睇阿凡達

本來一心等阿凡達上映時去新開既ISQUARE IMAX睇下個3D點勁法，點知等呀等呀.....  等左成個月，都買唔到飛睇阿凡達，網上睇仲好似爆到二月底添，最後把心一橫，星期三同蕃茄去左Megabox睇普通3D版算數。但人算不如天算，當日下晝三點上網買完飛後，突然身體極之不適，頭痛到曾經有打消去睇戲既念頭添，好在啪左兩粒Panadol，叫頂住先啦。

約左蕃茄響德福等，時為6點40分，嘩多人到，友人Fun三月會搬黎呢頭做野，你到時慢慢逼喇。

由於套戲開6點50分，我地差唔多要飛去咁濟，先趕及準時入場。

攞飛先，Megabox網上買飛手續費只需5蚊，

但套戲張飛100蚊呢

好，入場!

套戲成2個半鐘咁長，又未食飯，當然要買爆谷醫肚啦

我發覺我唔係咁適合睇3D戲，一來我對眼做過LASIK，黑既地方我既視力會有d模糊，而戴上3D眼鏡後更黑!  二來d字幕好難睇，英文戲還好，睇日文韓文泰文就真係唔知點算喇。講番劇情，睇特技睇畫面睇顏色就更係一流啦，但其實storyline係好straight-forward，好多情節都估到，唔算有乜野驚喜，d人講到係本世紀最好既戲其實係有d言過其實，而且場面有好多"熟口熟面"之處，浮響天空既"島嶼"似唔似天空之城?  隻Banshee又好鬼似風之谷喎，唔通Cameron都係宮崎駿粉絲?

不過最後想講句：「人類真係破壞好多。」

BVB小欖BBQ聚

大家可能會問，咩係BVB呀?  BVB其實係我隊排球隊既名，全面Boys Volley Ball, staight-forward到爆。適逢BVB成立一週年，又係隊中主將Tommy既生日，我地就響上週六搞個BBQ聚會賀賀佢。

話說大隊兵分兩路兩架7人車載各隊員入小欖，由於我不太熟悉新界西既路，故擾擾攘攘7點幾先入到BBQ場地。這個小欖場算十分大，驟眼睇都可容納100個爐，加埋麻雀枱，環境都唔算逼夾。

BBQ款式都幾齊全，豬牛雞扒海鮮雞全中翼乜丸物丸海鮮應有盡有，是日鬼整咁肚餓，所以不斷狂食，但蕃茄燒野效率奇慢，首趟燒雞全翼竟用左半個鐘，當然我要加緊催促佢先稍為燒快少少啦。

自助形式拎野食

附近附設把鬼夾公仔機

燒蜜糖麵包，正呀!

當晚影了很多相，但隊中搞鬼隊友叉燒玩Zoom，在相機個mon zoom盡哂所有人黎睇，導致眾人醜態盡現，我仲要重災區添呀！可惜呢度做唔到個效果，唔係post出黎俾大家笑下。

當晚另一焦點當然係隊友Tommy生日喇。Tommy係創隊成員之一，星期日既排球場多數係佢book，真係貢獻良多架，我仲特登訂左個搞鬼排球蛋糕俾佢添。開頭以為個蛋糕好睇唔好食，但食落眾人皆讚，好彩!

雖然係舊式排球，都好搞鬼啦

吹....... 蠟燭先啦

BVB一週年快樂，大家俾心機呀

因隊友Lawrence第二朝去日本，所以約10點鬆d便離開燒烤場，轉戰深井滿記甜品。去到時都幾多人等位，好彩我地夠人強馬壯，一入去伙計們就安排一張大枱俾我地喇。不過其實d甜品都好一般，我成日覺得呢d甜品舖總之係d吊腳位開一間，實會大把人幫襯，d人可能鍾意食完飯遊下車河再食甜品。

乜整到好似加太賀咁呀

雜果豆腐花 ─ 得好少豆腐

最後大家盡興而歸，但兜兜轉轉泊返架車返沙田，都成1點先返到屋企，喪渣車喪笑成晚搞到疲憊不堪。

捌叁美食亭

再嚟飲飲食食！

話說蕃茄早幾日去飲打牌贏左幾舊，一向有錢就身痕既佢話要出去食餐好既，所以昨晚就去了九龍城搵野食。本來諗住係去去開既一間泰國地踎舖食下泰國菜，唔知係咪去到只係6點9太早，成間舖包括人或物都好似未ready咁，所以就去了蕃茄提議既一間串燒店，83美食亭！

蕃茄：係咪去呢間呀

我：你話事啦

裡面裝修簡陋，客人亦不多，只有兩三枱。牆身掛滿相片，開頭以為全部都係藝人幫襯既合照啦，點知原來大多數都係自己伙記影相，藝人既合照只搵到蔡少芬同楊思琦！

餐牌上很多串燒選擇，亦有些拉麵及便當等。我同蕃茄因太肚餓關係，起勢咁叫，最後叫左約十幾樣的串燒，好彩老闆娘好有心思逐碟上，才不致於擺到一枱都係！

先叫左杯龍鳳檸樂，乜支飲筒咁長

蒜蓉包 ─ 牛油味稍遜

焗花甲 ─ 幾清甜呀

雞中翼 ─ 好惹味呀，唔知落咩粉整架呢

燒魷魚鬚 ─ 好爽，一d都唔韌

燒豬大腸 ─ 好好味呀d汁，10個讚，雖然一路食一路好有罪惡咁

 

燒粟米加燒雞皮 ─ d燒雞皮好似食卡樂B咁架

生蠔 ─ 有d腥囉

燒魷魚筒 ─ 用wasabi食幾新個feel

原條茄子 ─ 可唔可以俾多少少醬呢下?

燒雞翼 ─ 真係我最鍾意食

壓軸燒羊架 ─ 好味呀，點芥辣一流

最後黎個炸雪糕，響餐牌見到呢個item時我好興奮，因我響加拿大食過

一次雪糕Tempura，當時覺得超好食，但之後冇見過有得賣。今次試就.....  

同想像好大出入，加拿大食嗰個好大架成個波咁架

最後埋單岩岩好四百大元，貫徹蕃茄財唔散人唔安樂既精神，多謝哂！

久違了的加太賀

昨日在紅磡跟一眾波友打完波，見早早地7點鐘大家提議去加太賀食飯！記得約10年前首次認識呢間日本食店，當時友人已經到左，我唔識路靠友人喺電話指路，但周圍都係黑漆漆既工業區，搵極都搵唔到，但最後竟然見到一排色彩繽紛既燈飾，非常有日本FEEL，印象深刻。

時移勢易，近年日本食店其門如市，又有放題夾攻，加太賀受歡迎程度亦大減，甚至有朋友對之甚為抗拒添。不過既然冇試咁耐，我都好開心再黎食野。去到時為星期日夜晚7點半，理應係食肆黃金時間，點知‧‧‧‧

好冷清呀陰公，唔駛排隊不特止，侍應仲安排左一張超大既枱俾我地一行6人，真係受寵若驚！

人氣就唔夠喇，食物點呢？我地叫左好幾樣野，食落OK喎，唔係D人所講咁差，Keep到以前既水準。

軟腳蟹反卷 ─ 唔錯唔錯

花之戀 ─ 話哂係加太賀發明既，唔差得去邊啦

蟹籽沙律冷麵 ─ 黎到先知叫錯左，我expect好大盆架

焗墨魚咀 ─ 出乎意料好味，好爽

天外天壽司拼盤 ─ 一個字 "怪"

海螺刺身 ─ 好鮮甜，唔點醬都OK

蟹粥 ─ 好味但好飽肚，食兩碗已飽到嘔

土佐豆腐 ─ 我飛佛，死都要嗌

食到捧住個肚，都係每人百五蚊有找，算係咁啦！

BVB戰友們，下次再一齊食啦

桃花園記

自從喺呢間公司做之後，每年新春都會去新界幫老闆揀桔和桃花。老闆非常重視每年桃花開得靚唔靚，所以我地每次都精挑細選，務求每棵桃花都開得靚靚，老闆就心情靚靚，公司大展鴻圖。

唔知點解，每年我都幾期待去揀桃花，除左因為可以有半日唔駛響公司坐，更重要係可以同同事一齊開開心心郊遊新界一番。今年因為我個部門多了新同事，所以一行五人浩浩蕩蕩下午兩點半出發。

第一站係去桔園。此園莊老闆娘係幫開我地打理公司盆栽，所以每年送過嚟既桔都有番咁上下。今年見生意好轉，所以我都膽粗粗揀棵幾高既桔，打算放喺大廈門口當眼處，夠氣勢嘛！

揀完桔，拿拿林走去錦上路那邊揀桃花。呢檔桃花園我地已經幫襯第4年，雖然每年只見一次，但老闆財哥都認得我地，仲可以講到我地既公司名，生意人真好記性。可能今年天氣較凍，加上經濟好轉，花價都升左約兩成，我地派出幾位阿姐講價講到牙血都出埋，先可以用$4880成交兩棵約8呎既桃花，真係心力交瘁 (如果冇老闆娘響度阿之阿左，應該可以以較低價成交)。

個園都幾大，約有二百幾棵桃花

五代同堂，好趣緻呢

講價三寶 DC/JK/Fat

我地揀中既其中一棵，足8呎啦

勞碌半日，梗係要去抖下啦。接著我地去左蘇絲黃極力推介既榮昌豬扒飽。此店位處粉錦公路，環境幽靜，有d似以前大埔道既沙田茵餐廳。豬扒飽當然係我地既重點目的，當中四位同事都係叫呢個鎮點之寶。食落......  d飽幾鬆軟，但豬扒冇乜汁，洋蔥亦唔多夠，只可以叫做不過不失啦，無甚驚喜。

室外雅座

有小盆栽賣，一d都唔貴架

由於是日太凍，一向鍾意飲凍野既我都要

叫杯熱華田暖下

我鍾意樹，所以覺得呢條路好靚

是日飲到5點3，太陽都開始落山，係時候返歸喇。2010年桃花園遊就此結束，下年見！

"劉星"花園

弟婦就黎牛一，一家人約左去BBQ賀賀佢。呢次BBQ真係約左成個幾月，最後都搞得成，但蕃茄臨門病左，所以要避席養病。

細佬推介"劉星花園"BBQ場，呢個場响屯門龍鼓灘，唔渣車去真係應該"搵鬼去"。此場在Openrice裡保持零"彈"記錄，所以都有少少期望。去到見到個場都幾企理乾淨，有D燈飾點綴下都幾有氣氛。每位盛位80大元，算係幾平。

呢個亭台grand grand地架

入面食物都係一般燒烤食品，但每人包一隻帶子。是日可能冇乜胃口，所以食得唔多，成場都係同屋企人吹水居多。

要透爐喇

一排排幾整齊

今次BBQ只燒左3個鐘便急急腳要走，原來係媽咪要追亞視乜鬼韓劇既大結局，是日聚會就此結束。希望下次可以燒耐D啦!