2010-03-21

泰難忘之旅 ─ Day 2

哇哈哈,由於之前屋企部腦壞左,搞到呢個泰難忘之旅第二集遲遲出唔到街,真係見諒見諒! 我會盡我所能快快搞掂成個遊記架喇。

到左Day 2,其實先算係真真正正既足日遊覽。一朝早梗係要試下呢間餐廳既早餐啦,以我呢個懶訓鬼,去親旅行通常都係第一日會食酒店早餐,之後幾日都係訓到早餐時間過哂先捨得起身。但今次旅行就可以食足4日, 點解呢?  因為如果你隔離嗰個朝朝一早就起身梳洗兼換好哂衫然後不斷"哦"你叫你陪佢落去食早餐,咁又點會miss喎!!!!!
好眼訓呀仲 zzzzzzzZZZZZZZ
原來其他房既團友已經差唔多食完添,真慚愧
餐廳唔算大,食物種類亦不多
我最like一路飲橙汁一路飲奶
泰國人d食物portion出名細,估唔煎隻蛋都細過人

食完早餐,大家都好興奮咁想仆到出去行下,我地第一站係曼谷著名旅遊點翟度翟。呢個跳蚤市場只係逢星期六同日先開,而且出名"熱到溶",所以揀早D去希望冇咁熱。

我地搭自由行旅客甚為喜歡既交通工具BTS前往。BTS鐵路系統係曼谷市內主要既集體運輸工具,但佢歷史唔算好"悠久"架咋,99年尾先通車,以大城市黎講算好遲先有市內鐵路。雖然BTS已經過左佢10歲生日,但曼谷交通仍然係混亂擠塞不堪,真難想像99年前曼谷人係點樣周圍去架呢.....
買飛先
車到喇,寫咩呀架車
呢位團友,個鏡頭響呢邊呀

搭到去綠色線最尾一個站摩切(Mo Chit),就到翟度翟喇!  翟度翟又名JJ Market (因有譯音寫成JatuJak),1982年已經有架喇,現為全泰國(有些甚至話係全世界)最大既跳蚤市場。分為27個區,立立雜雜乜鬼都有,衣服鞋襪唔在講,又有傢俬、工藝品、園藝、食物、書籍、古董、甚至活生生既貓貓狗狗到嚇人既珍禽異獸都有,有說唔停咁行哂所有舖頭要4個鐘頭,大家可以想像有幾大啦!

我大大話話都黎過5-6次翟度翟,不過行黎行去都係1-5區附近,驚行得太入唔識出返黎呀,嘻!
翟度翟外圍 ─ 嘩咁渣車唔怪得塞到咁啦
好多背心賣呀,我見仲有皮褸賣添,但熱成咁,
真係著上身試下都唔多願呀
名副其實的「花燈」
攝石花
D狗仔熱到陰公
幾可亂真的蔬果山
唔得喇,行到太熱,要搵間餐廳歇一歇,
呢間餐廳係唯一一間有冷氣,仲唔衝入去?
咁熱唔係唔叫雪糕食呀,好野香蕉船黎喇,errrrrrrrr,
點解冇香蕉既? 問侍應,佢話:Banana not RED DEE (ready),
跟住笑笑口行開,吹佢唔漲

咁又行左3個鐘喇,係時候去下一個目的地 ─ 唐人街。本來行程係星期日先去,但星期日係大年初一,我地驚有舖頭唔開,所以改行程今日前往。我地搭的士去唐人街,但兜黎兜去都入唔到去,原來因為封哂路準備慶祝新年呀!
大型舞台搭建中,聽講泰國公主明日大年初一會大駕光臨喎,
大家都準備就緒
曼谷唐人街係一個舊區,周圍都有接近戰前既建築物(我自己講既),
泰國人想拍類似歲月神偷既戲可以係度攞景喎
唐人街第一個sub站係食魚翅,查實貨色好一般
同餐牌幅圖完全係兩碼子既事
手信熱點林真香,都掛燈籠應下節呀,老闆都話今日年卅晚早D收

行左成日攰到震,係時候返酒店擺低戰利品加抖下。夜晚我地又係行市集,係Suan-Lum Night Bazaar。呢個夜市亦係曼谷較出名既旅遊點,賣既野同翟度翟差唔多,但面積當然細好多啦,而且價錢較貴,不過好處係冇咁熱囉。
Suan-Lum Night Bazaar招牌牌坊

此夜市有一帶有好多酒吧同餐廳,我推介左一間"木偶餐廳"俾各團友。呢間餐廳我食過幾次,D泰菜水準不錯,而且招呼都幾好,不過去廁所最好搵人陪,因為去廁所條路有一"勒"木偶係度,見到都咪話唔心寒呀!
先黎杯西瓜汁,好飲到呢
泰式炒飯,好香好惹味
最鍾意炸物
點少得馬拉盞通菜呀

食飽飽返酒店有咩好做呢?  話說臨上機前我地成隊波波衫先趕起,而我負責去拎衫,由於大家急住見到件衫真身,而我拎左衫之後最快見到隊友既時候就係去旅行,所以徇眾要求下我拎埋D衫去泰國俾返佢地。當晚大家就試衫影相,玩得不亦樂乎呀!
BVB四子祝你新春快樂!!!

5 comments:

Fun said...

其實香港咁大間美珍香,為咩仲要喺泰國買姐?

Fun said...

噢,係林珍香!:p 不過論肉乾, 真係星坡嘅林志源最good!

TT震講乜啫 said...

係咪林志炫開架?

Anonymous said...

真慢... 快d 寫啦

TT震講乜啫 said...

得喇.... 一味催...