今晚又有那位香港人能安心睡?

整晚新聞直播，一幕幕震憾心靈既畫面，比看電影更叫人心寒!

一時話全車人被殺，叫人黯然，突然又見到有人質走出車廂，叫人欣喜，可惜最後仍然有7人遇難，叫人惋惜又憤怒!

曾特首宣讀傷亡數字時，天打一聲雷，連個天都不忍呢件事發生!!

願不幸遇難既人安息，願其家人能繼續堅強生活!

長毛.... 真令人失望

由懂性而嚟，我對政治呢家野，都叫做會關注下，雖不致叻到識得同人辯論政見，但一D社會運動我都有參與過，而自己對香港政治文化亦有一套想法。當年既六四令我瀝瀝在目，覺得共產主義係唔可行，所以一直以嚟我都係泛民既支持者，希望憑著支持佢地，有人可以為香港既自由民主繼續發聲。

其實我對以較激進方式爭取民主既手法唔會完全否定。我心目中激進既方法，可能係一班青年大學生，手繞手嗌口號遊行，甚至訓街絕食，我都覺得可以接受。但今日見到電視新聞，有一頭戴面具貌似未夠二十既小子，以火機偷偷嘗試燒斷縛住立法會外鐵馬的繩，我個心不禁不寒而慄：「究竟佢地知唔知自己做乜？」。點解社會運動會變成好似一班街童響屋邨樓下公園搗亂生事咁呢?  佢地知道政改係乜黎架?  定係見一班朋友嚟玩嚟搗亂好開心所以柴娃娃又玩埋一份呀?

但有時，言語暴力比起拳頭暴力更令人心寒!  長毛以一句「癌上腦」去形容為民主奮鬥廿多年既華叔司徒華，令大眾市民嘩然，更令一眾泛民支持者心碎。點解一個人可以用呢D幾乎唔係人講既說話去形容並肩作戰多年既戰友?  真係一次政見唔同，就覺得對方可以不用尊重而惡言相向?  這是政治家(或甚至一個普通人)應有的態度嗎?

在若干年前還未有社民連之前，比較激進既泛民人士只有長毛，佢帶領既五四運動最耍家係響左派人士面前示威狂嗌口號，雖則較激進但形象鮮明，反而惹起一眾泛民支持者關注。04年佢參加立會選舉，我睇電視辯論發覺佢原來講解自己政綱時都幾有紋有路，唔係得個惡字，而且好surprised佢英文原來唔錯，所以跟家人決定投佢一票。起初都以為佢冇乜希望，點知佢得票有成五、六萬，先知道原來亦有其他人對佢有信心，可以為我們在議會發聲。到08年雖然我投返俾卿姐，但長毛亦有10萬票支持，我才發覺，原來激進行為係更被港人認同。

08年社民連三子上場後，我對佢地既行為開始反感。掟蕉、謾罵、惡言相向，彷彿成為佢地既黨章。我覺得泛民應該再分為兩派，溫和同激進，而我絕對支持前者!

五一六公投，相信會係我最後投票俾長毛既一次，唔好意思，我真係唔能夠再認同你地。今次政改，雖然我唔完全贊成所謂改良方案，但我會支持民主黨，支持卿姐，因為我唔想香港再浪費五年，既然我地同對手(中央)唔係五五波競爭，咁有時都真係要讓步，要住先囉，既然曾生都講到實牙實齒用立法方式confirm 2017同2020既選舉方法，我地咪放長雙眼睇下!

幾時先可以坐返埋一條船?

被河蟹的六四

今日在微博興起既遊戲，係邊個既留言最快被系統管理員「河蟹」。

微博係新浪出品，敏感字如"六四"、"劉曉波"等當然自動篩選唔能夠post，但原來微博背後有一群用"肉眼"觀察既系統管理員，隨時隨刻留意大眾既留言，唔係幾啱聽既都一於照刪。

呢兩日我就收到以下系統私信:

真無奈，咁溫和既評論都被刪!  我第一次感受到言論自由被禁制，真的很難受，很難受。

而微博亦做得好徹底，平時可用既蠟燭同蛋糕符號，今日統統失蹤，心不禁彈一句：「洗唔洗呀?????」。

不過點都好，呢件事係發生咗就係發生咗，冇得否認。我只希望有良知既人，不要因為獻媚或睇到國家有著數，而去否定當日曾經為民主為自由為反腐敗而犧牲既學生平民所做過既野，佢地付出既係一條條寶貴生命，還用不屑既語言去評論佢地，實屬令人髮指!!

天佑BKK

突然間，519呢個數字，可能跟64一樣令人「不想回憶、未敢忘記」!

擾攘兩個多月既泰國紅衫軍示威，隨著多個紅衫軍領袖於5月19日宣布投降，本以為事件可以告一段落，人民可以重新振作，重建家園。點知................

部份暴徒唔忿氣，響曼谷四處地標肆意破壞，首當其衝既當然係幾個令泰國人引以為傲既大型現代化商場!  Central World (即World Trade)慘成戰耙，被狂徒縱火焚毀，全座商場幾乎燒通頂，就咁樣壯烈犧牲。而鄰近的Siam Paragon等商場亦被波及。

我都留過不少腳毛響呢個咁美麗既Mall!  基本上每次去BKK，都例牌會黎呢度行下。行呢個商場其實係一種好relaxing既experience，因為人唔多，可以無拘無束 (或漫無目的)咁行，店舖食肆又齊全，包有你啱食啱睇既地方。每次去都令我感覺好似以前在加拿大行Mall一樣，好舒服。

最記得有一次我同一班朋友響Central World近頂層既 Triple O's食lunch，全場差唔多得我地一枱人，我地成班嘻嘻哈哈傾左成兩粒鐘，冇人望你冇人jip你，好爽!

翻查資料，原來Central World前身World Trade於1990年開幕，至2002年由Central Group收購，易名為Central World。2006年完成擴建工程，增加55萬平方米空間。真係估唔到擴建4年後就壽終正寢，十萬個可惜呀!

聖誕時的Central World，竟然俾到人一種冬日感覺喎

因為香港伊勢丹執咗九世，所以去到我實行返夠本架

投票投票

近期Hit爆問題，5月16日你投唔投票呀?

本來都唔想響個blog特別講呢樣野，不過見到近日FB朋友既留言，令我有必要在這裡澄清下。

其實是次補選，著重唔係候選人，而係議題本身。

話說政府不斷宣傳大部份港人都希望循序漸進落實普選，但當年基本法講明最快07/08可落實，但04年人大釋法，話唔可以咁早，咁即係點?  即係可以講過唔算數，大家信心盡失。佢話17/20年可落實普選，到時又唔知係咪真架姐。

但現時無機制可以俾港人表達我地對普選既渴求，咁點算呢?  所以一班泛民人士，諗出用五區呈辭，來讓市民表達佢地係咪想爭取普選。你投返果個辭職議員，即係表示想爭取普選，唔係既話即係唔認同囉，就係咁簡單。

雖然我都覺得呢條橋有少少屎，但都係冇辦法中既辦法，我始終會透過呢次選舉表達我既渴求，因為呢次機會唔係有好多次!  但竟然FB上好多朋友扭曲，有朋友連大陸係咪應該普選都拎埋出黎講，更有朋友如潑婦罵街地說你想香港死就去投票啦!  言論冇POINT又侮辱，既然大家有自己立場，咪堅持自己己見囉!  你唔投票冇人話你，我去投票就咪鬼嘈生哂啦，唔係你話一句幫小丑打冧香港我就唔去投架喎，咪當人既思想係流先得架!

唔理咁多，今日一定去投票，講完!

荃加福祿壽 ─ 荃軍覆沒

睇咗三集「荃加福祿壽」，好想問：「究竟汪阿姐個定位係咩呢?」

首先唔講阿姐住，其實成個節目笑位係有，當然你唔好expect由頭笑到尾，但睇得出搞笑環節係幾多元化，而且係有俾心機落去。d搞笑歌詞，唔係求求其其，歌詞到肉得黎又押韻，拍得住80年代既EYT金像獎頒獎典禮。造型都算一絲不苟，而且扮邊個諗過度過，貼近娛樂圈最新鮮hot news，又唔淨止扮本地藝人，會扮Lady Gaga同Wonder Girls等，擺明唔想只係走屋邨師奶得啖笑路線。三個男主角扮女人多過男人，又假髮又假眼睫毛都咪話唔煩呀。每集又加插藝人扮野環節，都有好多驚喜，欣宜扮徐子珊真係幾似。

咁阿姐又響度做咩呢?  第1集大家笑到碌地時，佢無端端走出黎唱首萬水千山總是情，點先?  之後再要加碼唱多首，係咪想大家提早轉台?  而佢間場時既MC tasks，講到背稿咁，又想懶係鬼馬，搞到變咗四不像。到第2集，唔知TVB係察覺唔對路定汪阿姐真係唔舒服，竟然冇佢份唱歌喎，成個show當堂smooth哂!

到前日呢集，個問題又出現喇!  成個show基本上有四份一part係名曲滿天星2!  汪阿姐唱我的驕傲，一句：I'm "proud" to fly up high....  幾近粵曲腔，果一下我真係不其然打了一個冷震。講真我不嬲都覺得阿姐既唱功，演技，同司儀口才都只係屬二線貨色，做得阿姐只係因為佢既資歷同堅守做事原則令人服佢，但希望佢真係唔好再在佢一些弱項上顯醜。

另外TVB又係要鬧，次次搞新節目，從無考慮鎖定一個target group，乜都要大眾化最好姨媽姑姐細路哥都鍾意睇，既然今次節目扮得咁多後生仔鍾意既外國偶像，咪鎖定俾後生睇囉。你扮Lady Gaga d嬸嬸們大多數都唔知你扮乜水，又點會覺得好笑，扮徐小鳳就差唔多。

再唔諗下計搞搞阿姐個定位，莫講「荃軍覆沒」，

「全軍覆沒」都不遠矣呀!!

一倍定兩倍?

今早我既同事走黎問我：「曾生，我想請半晝假！」

我：「冇半晝架喎，最少半日。」

同事：「即係半日囉！」

我：「..........」

以我理解，一個上晝或下晝，為之一晝，只請半晝，即係請兩個鐘。照佢咁解，其實佢請半晝定一晝，都係請半日。

當然我咁諗法，係有D怪，但其實又唔錯哂。

其實呢D無棱兩可既說話方式，成日響我地既生活發生。以我為例：

案例一

一倍定兩倍

其實一倍同兩倍響一般人心目中有冇分別架呢?  舉例說，4係2既一倍，咁即係20只係2既九倍咋喎，咁樣講又好似怪怪咁。

案例二

出定唔出

我成日打排球，每次一隊只出6個球員，如多過既話會以猜拳形式決定。我地最鍾意用「包揼少出」法分勝負，即係少數既就要出。咁好喇，究竟係少數既要出，係出場? (即出場打) 定出場外休息先冇得打呢?  呢個問題又係次次拗。

唉.... 咁究竟你出唔出啫.....

巧傷感

突然收到消息，一位剛搬來我公司附近工作的親密戰友，在lunch時間之前突收到公司要Terminate佢個contract，原因係其所屬既附屬公司唔再搞一D選美Event! 

收到消息後，我個心好酸，唔係因為戥佢冇左份工，更唔係因為冇人陪我食飯，而係點解一個對選美呢方面咁有talent既人，公司都可以放棄，寧願俾一班唔投入唔志在唔專業既人去搞，簡直係資源錯配，捉到鹿唔識脫角。

在此希望我這位朋友能夠快快收拾心情(其實佢就冇乜野)，再喺第二個領域發揮所長啦!

做人係咁架喇!  (朱虹腔)

星期六，向道德塔利班說不

明光社，今個星期六賣旗。

你可能會認同或某程度認同佢既立場，但究竟呢種立場係咪對整個社會在道德上及互相包容尊重上係好事，值得商確。

假借宗教名義，欺壓小眾，還口口聲聲造福社群，你又會透過賣旗籌款這玩意直接地助紂為虐嗎?

如你還未認識明光社，可從此link看看壹週刊專訪其"社長"!

性戰沙皇蔡志森

星期六，全民起義，向道德塔利班說不!!!!

(加按: 原來係2月13日下星期六先啱, 對唔住大家)