2010-09-16

去年今日

多得Facebook裡有個小推介,會提下你睇睇裡面的舊相薄,重溫昔的片段。今日呢個小推介就提下我去年往加拿大旅行既相簿,原來去年今日,就係我出發既日子,估唔到咁快就一年喇。

呢個Trip既目的其實係為咗我既好好好朋友SK而去既,因為佢"終於"都嫁得出,我呢個相識於Grade 10既好朋友梗係要飛過去賀下佢啦!  而且我亦有8年冇返過去,所以呢次既旅程我都真係好期待。短短10日既行程,學我同SK話齋,就好似一場夢咁,好開心亦都過得好快,快到好似唔記得有去過一樣。

呢一年真係過得好快,我亦不時會想起旅程裡的每個片段,叫人非常難忘,我亦好掛住我的好友SK!  又一年冇見喇,希望好快再可以見到妳啦!

突然好想將去年的旅程寫落黎,不過以我咁hea既性格,
可能要下年先可完成,都係諗下好喇...


2010-09-14

打波當郊遊

平時其實甚少會在星期六晚跟友人打排球,一來通常有約,二來想多些抽時間在週末陪下屋企人,煮下飯打下麻雀又一日。

但上星期六就有d唔同,我地隊波有幸被邀請作友誼賽,而地點就係赤柱體育館。嘩,真係好耐冇去過赤柱,今次借呢個機會打波當去fieldtrip都幾好喎,所以一口便答應。當晚打7點至10點,成程落住大雨,一行8人浩浩蕩蕩入赤柱,都幾得意喎。

三小時激戰,總算贏多輸少,激戰過後當然係想遊下赤柱啦,可惜仍然落住雨,就求其搵間餐廳食d野,feel下赤柱氣氛。赤柱大街一帶都酒吧林立,印象中都應該幾興旺,但今晚卻非常冷清,人流疏落,每間舖得小貓兩三枱,所以我地八人既枱,老闆娘都好快安排到。

我地揀咗一間Bar & Grill,叫"赤柱大街"

場內有超大電視直播英超賽事,有侍應過黎
問我地係咪一定要睇波,因為佢地想轉台,我地
當然歡迎啦!  點知最後都冇轉過台,把鬼!

我叫了一個Set Dinner,餐湯係南瓜湯

唔要湯,可以揀沙律

主菜Fish & Chips ─ 好少在香港食呢樣野,ok喎,
令我諗起讀high school時響canteen既情景

埋單約$140,同預計差唔多,赤柱d餐廳係咁上下。


雨夜既美利樓


2010-09-07

我要做人大伯喇

經歷30個鐘陣痛,我既弟婦Tammy終於生咗我地曾家第一個新成員Tyrus喇,足足有八磅架! 睇見Tammy咁辛苦,真係真真正正感受到做媽媽既偉大,Tyrus仔你大個一定要孝順媽媽呀!

今日大約六點三Tyrus終於出黎睇下呢個世界喇,但到七點九都遲遲未見推出產房,我地一眾人都為之非常心急。最後接近8點終於有護士推BB同Tammy一齊出黎"過房",但只衝衝幾秒,我地眾人在走廊雖然拎好哂相機,但最後莫講話影唔到,連正面都見唔切呀,過咗房之後又過咗8點,過哂探房時間,不過我地都偷偷地睇下Tammy,但BB就洗緊白白,冇辦法啦,伯伯聽日先見你喇!

今日我就榮升做大伯喇,又多一個唔同身份,感覺好特別,而且唔認老都唔得喇!

 呢張相靠佢爸爸快手影架咋,
Tyrus仔你要快高長大喔!

Tyrus仔你快快出黎

我就快做人大伯喇,心情真係好興奮!  猶記得今年一月一次family BBQ gathering裡,我細佬宣布弟婦有咗BB開始,我已經好期待呢個姪仔出世。時間真的過得很快,眨下眼弟婦昨日已經開始作動了!  昨晚去探過佢,見佢都幾辛苦,但仍然係徘徊係2度左右,到而家都差唔多痛咗二十幾個鐘頭喇。Tyrus仔好想快d見到你呀,想睇下你既樣,究竟似嗲哋定媽咪呢?  同埋你快快出黎,唔洗你媽咪咁辛苦嘛,乖乖啦!

2010-08-23

今晚又有那位香港人能安心睡?

整晚新聞直播,一幕幕震憾心靈既畫面,比看電影更叫人心寒!

一時話全車人被殺,叫人黯然,突然又見到有人質走出車廂,叫人欣喜,可惜最後仍然有7人遇難,叫人惋惜又憤怒!

曾特首宣讀傷亡數字時,天打一聲雷,連個天都不忍呢件事發生!!

願不幸遇難既人安息,願其家人能繼續堅強生活!

2010-08-19

18年, 還一個心願, 澳門之旅!!

呢排專注隔離台既港姐update,呢邊都有成個幾月冇好好寫過一篇文章,係時候要pick-up返喇。

剛過去既一個weekend,我做咗一件18年都冇做過既事 - 過澳門!  大家係咪好驚訝點解我會咁耐冇去呢?  其實我都唔知點解,對上一次去(即92年),當時亦係8月,係我臨去加拿大讀書前最後一個暑假,跟媽咪同一班親戚表兄弟姊妹去既一次!  當時既記憶都好模糊,只記得響間service apartment媽咪同班親戚竹戰,表哥帶我地去一間舖頭買A貨polo shirt,就得咁多。

之後響加拿大讀書,返香港放暑假都冇去過澳門,到98年畢業返香港做野,竟然咁多年都冇去過!  其實機會唔係冇,只係唔知點解幾次機緣巧合,講黎講去都唔成事。不過今次機會又黎喇,事關女排大獎賽響澳門有分站賽,成班排球波友嗌住要去,我當然唔錯過抆衫尾既機會啦。就係咁,18年還一個心願既澳門之旅就響上星期六成行!

雖則話非常期待,不過過澳門始終都係"細唉野",冇咩要準備,所以星期六下晝響屋企咪咪摩摩整埋d野先同蕃茄施施然去碼頭。去到已經大約5點,匯合剛睇完波既隊友,前往我地住既service apartment!

黑色的士,好懷念呢

先到球場匯合,等我扮下野先,
我D一傳係咪好好呢



去到位於Oceans Gardens既Service Apartment,果真
唔錯呀。全屋接近有二千呎,有3間房,地方乾淨企理,
冷氣夠凍!!  六個人住夠哂空間!

露台夕影景色好靚呀

出門口時未睇完既卡通,竟然響澳門呢邊
睇返個尾,how perfect!

好大個廚房呀,如果會住多幾日,一定要煮餐飯!

眾人擾攘個多小時執靚個樣後,就正式遊澳門喇! 7點幾個個餓到隻鬼,梗係醫肚先啦,DM建議去佢"由細食到大"既澳門坤記,我地當然冇意見啦! 呢間坤記位於水坑尾街,原來都幾歷史悠久架喎,被喻為澳門平民葡菜飯堂。入到去一副舊式冰室格局,樓高兩層,冇豪華裝修,勝在夠街坊夠人情味。由於眾人實在太似剛放監出黎,所以嘭嘭聲叫咗十碟八碟,食咗再講!


個招牌有d證券行feel

馳名脆豬,搽牛油一流

咖喱牛腩,俾碗飯丫唔該

炆牛尾 ─ 我冇食,我不嬲麻麻

炒通菜

魷魚 ─ 幾惹味

薯仔肉碎 ─ 爭住送飯啦

葡腸+肉+豆 ─ d豆味好怪,唔多得

焗雞 ─ 其實係ok,但我好怕噚勁雞味

馬介休球 ─ 噫.... 有骨既.....

呢餐加埋酒水食咗六百幾蚊,ok啦。之後行去市中心逛逛,原來澳門既街道都幾有特色,我最鍾意d街燈,好有歐陸情懷,新舊建築交錯,有種上世紀六七十年代風味,感覺唔錯。街頭唔算好多人,但都幾商業化,什麼鉅記咀香園開到成行成市,好在起係d具特色既建築物當中,唔幫襯都可以欣賞下。


澳門一夜

呢個商場適合做10月哈囉喂場景喎

樓上古舊風格跟商業化既地舖相形成趣

Happy Face 葡撻

手信街人頭湧湧

大三巴呀!!!  記憶中係未黎過

長街角

乜黎架呢?

呢邊都有義順喎,當然叫個燉奶啦

必勝客個friend

最後去新葡京碰下運氣,原來呢度既Casino可以食煙喎,
煙霧彌漫好惡頂,個感覺完全唔似加拿大d賭場!  今次
發現一部骰寶機,即係買大細,玩上癮呀!  今晚幾好運
贏咗5舊水!

玩完係時候搵地方食宵夜

搵搵下去咗一條古色古香既巷仔喎

我都唔執輸影張先

最後都係搵唔到食宵夜既地方,其實眾人都唔算好餓,所以決定返酒店休息。但返去之前想去便利店買D水,點知搵咗半粒鐘又冇的士又冇水,為之氣結。最後俾我地搵到間OK + 貢茶店,如發現綠洲一樣!  不過之後都係要行返去賭場附近,先有的士搭!  講到尾,都係香港最方便 (或者係香港搞到我地對"方便"既要求太高)!!









2010-07-06

重逢是多麼激動

今日在Facebook看到一個轉載的video,係關於一些美國軍人靜俏俏返屋企俾家人一個surprise,過程真摯溫馨,我亦竟然睇到好投入,花咗大半日時間睇哂相關既片段,當中笑中有淚。其實自己都算幸運,最愛最喜歡見的人都在身邊(當然有些朋友在加拿大啦),從來冇諗過自己的親人會不在自己身邊。而片中的小朋友,很多父親都身在非常危險的戰地服役,掛念之情確實令人動容。希望呢個世界少D戰爭,讓每個小朋友都可與家人開心共聚。



其他片段亦可上 http://welcomehomeblog.com 睇睇。最難忘是6月22日post的那段,仔仔見到爸爸在課室,即上前攬住佢激動落淚,而身邊的家人及同學都受感動,我也眼濕濕呢。

2010-06-25

長毛.... 真令人失望

由懂性而嚟,我對政治呢家野,都叫做會關注下,雖不致叻到識得同人辯論政見,但一D社會運動我都有參與過,而自己對香港政治文化亦有一套想法。當年既六四令我瀝瀝在目,覺得共產主義係唔可行,所以一直以嚟我都係泛民既支持者,希望憑著支持佢地,有人可以為香港既自由民主繼續發聲。

其實我對以較激進方式爭取民主既手法唔會完全否定。我心目中激進既方法,可能係一班青年大學生,手繞手嗌口號遊行,甚至訓街絕食,我都覺得可以接受。但今日見到電視新聞,有一頭戴面具貌似未夠二十既小子,以火機偷偷嘗試燒斷縛住立法會外鐵馬的繩,我個心不禁不寒而慄:「究竟佢地知唔知自己做乜?」。點解社會運動會變成好似一班街童響屋邨樓下公園搗亂生事咁呢?  佢地知道政改係乜黎架?  定係見一班朋友嚟玩嚟搗亂好開心所以柴娃娃又玩埋一份呀?

但有時,言語暴力比起拳頭暴力更令人心寒!  長毛以一句「癌上腦」去形容為民主奮鬥廿多年既華叔司徒華,令大眾市民嘩然,更令一眾泛民支持者心碎。點解一個人可以用呢D幾乎唔係人講既說話去形容並肩作戰多年既戰友?  真係一次政見唔同,就覺得對方可以不用尊重而惡言相向?  這是政治家(或甚至一個普通人)應有的態度嗎?

在若干年前還未有社民連之前,比較激進既泛民人士只有長毛,佢帶領既五四運動最耍家係響左派人士面前示威狂嗌口號,雖則較激進但形象鮮明,反而惹起一眾泛民支持者關注。04年佢參加立會選舉,我睇電視辯論發覺佢原來講解自己政綱時都幾有紋有路,唔係得個惡字,而且好surprised佢英文原來唔錯,所以跟家人決定投佢一票。起初都以為佢冇乜希望,點知佢得票有成五、六萬,先知道原來亦有其他人對佢有信心,可以為我們在議會發聲。到08年雖然我投返俾卿姐,但長毛亦有10萬票支持,我才發覺,原來激進行為係更被港人認同。

08年社民連三子上場後,我對佢地既行為開始反感。掟蕉、謾罵、惡言相向,彷彿成為佢地既黨章。我覺得泛民應該再分為兩派,溫和同激進,而我絕對支持前者!

五一六公投,相信會係我最後投票俾長毛既一次,唔好意思,我真係唔能夠再認同你地。今次政改,雖然我唔完全贊成所謂改良方案,但我會支持民主黨,支持卿姐,因為我唔想香港再浪費五年,既然我地同對手(中央)唔係五五波競爭,咁有時都真係要讓步,要住先囉,既然曾生都講到實牙實齒用立法方式confirm 2017同2020既選舉方法,我地咪放長雙眼睇下!

幾時先可以坐返埋一條船?

2010-06-19

可人兒

近期I-phone Playlist經常聽一首楊千嬅既舊歌 ─ 可人兒,諗起有好幾位朋友都好似歌詞描述咁,外在條件不錯,有自己事業,身邊有一堆朋友陪玩陪逛陪傾心事,但好似身邊永遠都欠一個最重要的人。佢地唔係完全冇拍過拖,但永遠都係唔長久。有好幾次同佢地深入分析,究竟問題喺邊呢?  D人覺得佢地條件太好唔敢作主動? 覺得佢地太多朋友太social?  覺得佢地花花弗弗咁,對情愛呢家野實係玩玩下? 

當時人大多既答案係:吓? 我唔係咁喎、 唔係吖,D人錯覺囉 、  我不知幾恨可以一對一呀 。  諸如此類,當然實情係咪完全咁,我都心裡有數,但好肯定佢地對愛情都係有一種誠意,係真係想搵個人,但...........   遇唔到。



作曲:黃丹儀
填詞:黃偉文

良朋常常提著我
這麼多好友愛我最多
可笑是這麼可愛  對快樂無助
這數年不理深愛著誰 亦未被對方珍惜過
沒有花 沒有果 但我記得他怎拒絕我

要是可愛 為何無人愛我
夜夜獨自一個 祈求誰來家裡坐坐
抬頭望鏡亦算 不失不過
到底我甚麼出錯
要是可愛 為何無人愛我
夜夜獨自一個 回來和牆壁唱著愛歌
唱到自信恐怕亦無多
連我自己都不愛我
(而我亦笑問憑甚麼)

良朋常常胡亂猜
我這麼可愛  愛侶滿街
嘲笑內帶點安慰 勸我別言敗
激奮時總會擁我入懷 落力為我開解不快
越要開 越要解 讓我更加擔心我狀態

是你麼 若有人愛我
是你麼 這地球男孩如此多
情人在哪兒 情人是你麼

情愛是決定遺下我


各位bros and sis,等多陣啦,唔好放棄呀!

2010-06-17

傻仔唔識戴錶

由於近期港姐新聞多多,顧住update隔離台港乜姐,都少咗時間update我個騰騰鎮,真係要focus返多d先得!

呢排唔知蕃茄做乜鬼,繼上次送了盆栽擺設俾我,近日又無事無幹無啦啦送件驚喜禮物俾我喎,今次仲係闊佬咗添!

登登登櫈

嘩.....

估唔到蕃茄會送我兩隻錶喎,咁岩得咁橋我真係想買錶,真係非常多謝呀!

好喇,入正題,以下一則傻仔戴錶故事:

話說我不嬲都好少買錶,由細到大可能買錶唔過十隻,所以對錶既common knowledge真係好一般。咁呢,我戴圖中右手既錶返咗一日工,到第二日,發現停咗喎,我以為我較錯咗,所以較返岩之後繼續戴。之後過咗一個weekend,又發覺停咗,於是去間舖問下係咪壞咗。

去到間舖後我同老闆講哂成個story,佢笑笑口話:「呢d錶要戴住成會郁架喎!」哦... 原來係用Kinetic energy作運行動力既錶,我記得我都聽過下呢D錶,但我以為係Rolex果d貴錶先會咁添!  好彩我d聲氣都好好,唔係實俾個老闆串返轉頭呀,滴汗......!

傻仔唔識戴錶故事就此完畢