我要做人大伯喇

經歷30個鐘陣痛，我既弟婦Tammy終於生咗我地曾家第一個新成員Tyrus喇，足足有八磅架! 睇見Tammy咁辛苦，真係真真正正感受到做媽媽既偉大，Tyrus仔你大個一定要孝順媽媽呀!

今日大約六點三Tyrus終於出黎睇下呢個世界喇，但到七點九都遲遲未見推出產房，我地一眾人都為之非常心急。最後接近8點終於有護士推BB同Tammy一齊出黎"過房"，但只衝衝幾秒，我地眾人在走廊雖然拎好哂相機，但最後莫講話影唔到，連正面都見唔切呀，過咗房之後又過咗8點，過哂探房時間，不過我地都偷偷地睇下Tammy，但BB就洗緊白白，冇辦法啦，伯伯聽日先見你喇!

今日我就榮升做大伯喇，又多一個唔同身份，感覺好特別，而且唔認老都唔得喇!

 呢張相靠佢爸爸快手影架咋，

Tyrus仔你要快高長大喔!

Tyrus仔你快快出黎

我就快做人大伯喇，心情真係好興奮!  猶記得今年一月一次family BBQ gathering裡，我細佬宣布弟婦有咗BB開始，我已經好期待呢個姪仔出世。時間真的過得很快，眨下眼弟婦昨日已經開始作動了!  昨晚去探過佢，見佢都幾辛苦，但仍然係徘徊係2度左右，到而家都差唔多痛咗二十幾個鐘頭喇。Tyrus仔好想快d見到你呀，想睇下你既樣，究竟似嗲哋定媽咪呢?  同埋你快快出黎，唔洗你媽咪咁辛苦嘛，乖乖啦!

重逢是多麼激動

今日在Facebook看到一個轉載的video，係關於一些美國軍人靜俏俏返屋企俾家人一個surprise，過程真摯溫馨，我亦竟然睇到好投入，花咗大半日時間睇哂相關既片段，當中笑中有淚。其實自己都算幸運，最愛最喜歡見的人都在身邊(當然有些朋友在加拿大啦)，從來冇諗過自己的親人會不在自己身邊。而片中的小朋友，很多父親都身在非常危險的戰地服役，掛念之情確實令人動容。希望呢個世界少D戰爭，讓每個小朋友都可與家人開心共聚。



其他片段亦可上 http://welcomehomeblog.com 睇睇。最難忘是6月22日post的那段，仔仔見到爸爸在課室，即上前攬住佢激動落淚，而身邊的家人及同學都受感動，我也眼濕濕呢。

傻仔唔識戴錶

由於近期港姐新聞多多，顧住update隔離台港乜姐，都少咗時間update我個騰騰鎮，真係要focus返多d先得!

呢排唔知蕃茄做乜鬼，繼上次送了盆栽擺設俾我，近日又無事無幹無啦啦送件驚喜禮物俾我喎，今次仲係闊佬咗添!

登登登櫈

嘩.....

估唔到蕃茄會送我兩隻錶喎，咁岩得咁橋我真係想買錶，真係非常多謝呀!

好喇，入正題，以下一則傻仔戴錶故事：

話說我不嬲都好少買錶，由細到大可能買錶唔過十隻，所以對錶既common knowledge真係好一般。咁呢，我戴圖中右手既錶返咗一日工，到第二日，發現停咗喎，我以為我較錯咗，所以較返岩之後繼續戴。之後過咗一個weekend，又發覺停咗，於是去間舖問下係咪壞咗。

去到間舖後我同老闆講哂成個story，佢笑笑口話：「呢d錶要戴住成會郁架喎!」哦... 原來係用Kinetic energy作運行動力既錶，我記得我都聽過下呢D錶，但我以為係Rolex果d貴錶先會咁添!  好彩我d聲氣都好好，唔係實俾個老闆串返轉頭呀，滴汗......!

傻仔唔識戴錶故事就此完畢

陽光檸檬茶 ─ 樊亦敏篇

而家有youtube真係令我地呢d懷舊迷好開心，又可睇返以前既劇集同MV，又可以睇下經典廣告，今次我搵到既係89年既陽光檸檬茶廣告!

記得嗰時細細個，覺得點解香港會有個姐姐(即樊亦敏)咁靚既? 後尾佢選91港姐，即刻嘩一聲：咪係佢??  所以嗰年港姐我好留意佢!  但而家睇返，其實佢呢個look都未算最靚，同埋感覺有份倀雞feel (可能之後睇佢演出覺得佢份人係咁)!  而佢既演技同個男仔都係麻麻地喎!

睇完個clip，心血來潮買包陽檸黎飲，個包裝故之然唔同哂啦，但d味道....... 乜咁既?  完全搵唔返果種感覺呀!

我都係鍾意舊時既陽光....... 嘻!

小驚喜

今晚返到屋企，蕃茄俾咗個小驚喜我，雖則唔係咩大禮，但份心意令人好窩心呢!  仲有張咭喎，當然內容不便公開啦!  wahahahah

謝謝您!

又準又特別的心理測試

朋友send來youtube一個日本人做的心理測試。片中測試員扮成客席教師，在不同血型的幼稚園學生前裝作打爛花樽，睇睇小朋友的各種反應，以測試不同血型是否會對小朋友的性格有影響。

片段如下：


睇完之後，我很驚訝測試既準確性，身邊朋友及家人均可大約以這測試分類唔同性格，仲準過分星座呀!  我曾經見過兩次工，面試前都需要填上血型，初時都R哂頭唔明點解要填，而家知喇!  呵呵!

左耳耳嗚

大家會唔會因為鼻塞或長期打乞嗤而搞到耳仔聽唔到野呢?

我會!

我周不時因上述問題以致耳仔(尤其左耳)會聽唔到野。其實當然唔係真係完全聽唔到野咁誇啦，個情形就好似你沖涼洗頭出黎D水"鯨"咗響耳仔咁樣，聽既聲音會比較矇咁囉。

之前呢個問題每次出現都只係維持數小時，但今趟已經維持幾日，已經嘗試捏住個鼻逼D氣出黎或大呼小叫吞口水都無法根治，我懷疑係耳內肌肉有d移位，今次真係要睇醫生喇 >_<

一倍定兩倍?

今早我既同事走黎問我：「曾生，我想請半晝假！」

我：「冇半晝架喎，最少半日。」

同事：「即係半日囉！」

我：「..........」

以我理解，一個上晝或下晝，為之一晝，只請半晝，即係請兩個鐘。照佢咁解，其實佢請半晝定一晝，都係請半日。

當然我咁諗法，係有D怪，但其實又唔錯哂。

其實呢D無棱兩可既說話方式，成日響我地既生活發生。以我為例：

案例一

一倍定兩倍

其實一倍同兩倍響一般人心目中有冇分別架呢?  舉例說，4係2既一倍，咁即係20只係2既九倍咋喎，咁樣講又好似怪怪咁。

案例二

出定唔出

我成日打排球，每次一隊只出6個球員，如多過既話會以猜拳形式決定。我地最鍾意用「包揼少出」法分勝負，即係少數既就要出。咁好喇，究竟係少數既要出，係出場? (即出場打) 定出場外休息先冇得打呢?  呢個問題又係次次拗。

唉.... 咁究竟你出唔出啫.....

粵曲..... 好難投入

家母近幾年愛上粵曲，成日同一班粵曲愛好者一齊夾歌，練歌，仲每星期上一日堂，非常投入。因為同一些粵曲團體有來往，所以佢亦不時有些表演項目，一來可以過下曲癮，二來又可以多D演出經驗，可謂一舉兩得。不過大家唔好以為係人地「請」佢表演喎，係要自掏腰包架，真係出錢出力呢。

今次表演場地係「高山劇場」，呢個地方我從來冇去過，原來呢個劇場規模不大，雖然位處較高，但絕對唔係高山咁高，有少少名不副實喎。

夜晚的高山劇場

從來冇去過，梗係留個念啦

現場海報

間場時大合照

濃粧既媽咪，感覺好新鮮呢

媽咪出場喇

因為相機要錄video，我左手用手機拍呢張相，

唔係好清呢

說老實我對粵曲真係興趣麻麻，一來佢地唱既唔係《帝女花》、《紫釵記》等耳熟能詳既名曲，冇乜共鳴；二來每首曲目都係好長，起碼二十分鐘以上，所以一路睇一路放蚊。而我同細佬們坐位有D距離，好彩我剛加入I-phone行列，可以上網Chat下，我地幾個更一路睇一路在Facebook comment各演出者既表現，好鬼過癮。不過做仔既，點都要捧下阿媽場呢!

愛上Iphone

3月30日出咗iphone，4月2日終於成功轉台!

其實話買iphone講咗好耐，都試過去數記問過幾次，都臨門撻Q，冇買到!  點解呢?  因為對Apple呢個牌子有點抗拒。其實我算係IPOD第一代用戶，2002年出了一部，但問題多多，更因為咁同Apple香港既Authorized Dealer理論一番，refund咗部機，從此對Apple產品冇乜好感。

呢幾個月，係咁問用開Smartphone既朋友攞「用家意見」，總括黎講都係Iphone最多正面評價，所以戰戰競競咀"扑鎚"，搏多舖囉!

我自問好懶去Explore新機，成日標榜可以俾我響街度上Facebook同響MSN同D朋友傾下計，已經好夠，所以我選擇500MB用量既Plan!  昨日第一日可以用數據，就係咁乜都試下，又chat又facebook，又"單撈"好多apps玩，非常過癮。上itunes揀apps，揀到兩點都仲好興奮，第一日已經中咗毒!  Check下用量，死成40MB，點捱一個月唔過500MB呀?  後悔冇用無限計劃-ing!!! 其實爭$150，輸場麻雀唔止啦。

奉勸各位想出Iphone既朋友，真係要小心考慮揀plan，真係各人所求唔同，唔好低估自己用iphone既「小宇宙」。Happy Iphone-ing!!

我的Iphone，呢幾年靠你喇!

柴娃娃團年飯

週日約咗一班朋友暨舊同事聚舊團年。呢班朋友其實係我98年時做第一份工時認識既，唔知大家仲記唔記得香港電訊既互動電視服務呢?  我地就係喺呢度做CS架喇，當時一齊上training，可能大家都係剛大學畢業，年紀相若，所以迅速熟起來。雖然我只做咗一個月，但之後不斷都有gathering聚下，眨下眼大家就十幾年朋友喇。

今次團年飯既地點係SL屋企，我地叫左d壽司及家常小炒，實行中日混合賀歲晚呀。

擺到一枱都係呀!

中日cross-over ─ 壽司加沙薑雞

飯後仲有甜品 ─ 芒果蛋糕

好喇，食到飽飽，有咩好做呢?  當然玩下Game呢，自從若干年前自家發明搶錢冚棉胎後，差唔多所有game都加入搶錢元素。今次我哋玩搶錢豬，唔好以為好"輕kang"，其實都會玩到心跳加速標哂冷汗架，玩法其實同7級豬冇分別，不過instead of摸鼻，儲齊4隻既人要響中間個pool度拎一個銀仔，而其他人見狀亦都要鬥快搶銀，當然銀仔數目係預少一至兩個，如搶唔到就要加一級，唔同級既人唔可以傾計架，唔係就低級既豬會「升呢」至高級豬既級數，我就係咁無啦啦升為六級豬 (其實只輸過一次)。

玩到筋疲力竭後，大家都坐定定睇超級巨聲「大結局」，冠軍選左係來自大陸既王雯，佢係唱得好既，但其實自從加入咗大陸參賽者，我對超級巨聲既熱情減卻咗好多，因為覺得變咗冇乜代表性，始終要成為香港一個超級巨星點都要識D廣東話卦?  同埋可唔可以整一集係鬥唱本地經典金曲呢?  相信觀眾會有更大共鳴感。

最後祝大家新一年更上一層樓，開開心心啦!

告別RT

估唔到翻生後第一篇文章，已經添了少少離愁別緒。

友人RT即將去秘魯做一年義工，本來一早想嚟個飯聚，奈何呢個唔得閒嗰個又忙，約來約去都約唔成。昨晚六點幾收到SW電話，咁啱個個得，咪仆到去旺角見下呢班選美友。

飯聚主題離不開RT將會遇到既秘魯生活，但今次飯聚卻有另一番意義，稀客ET出現呀!  ET本身一直有同我地玩開，但05年時跟RT有少少誤會，所以之後較少機會佢地會同場出現。難得今次大家冰釋前嫌，握返手，我同SW都有D安慰。

飯局話題主要由多咀ET由頭帶到尾，佢對佢既公仔選美仍然樂此不疲，我地雖然興趣麻麻，但見佢講到眉飛息舞我地都笑聲不絕。

左起: SW/TT/RT/ET/Tiger

是次最肉酸既地方，莫過於轉場去食糖水途中，因一時感觸淚灑朗豪坊。諗起黎緊一年我地既選美聚會又少了一位要員，真係覺得好唔捨得呢....

D豆腐花好似石膏粉咁，最後只食D雜果呀

最後祝RT一切順利，雖然話去做義工，但响呢D國家點都有少少危險，你自己執生喇!  我地好快又會見面架喇!!