2010-04-12

荃加福祿壽 ─ 荃軍覆沒

睇咗三集「荃加福祿壽」,好想問:「究竟汪阿姐個定位係咩呢?」

首先唔講阿姐住,其實成個節目笑位係有,當然你唔好expect由頭笑到尾,但睇得出搞笑環節係幾多元化,而且係有俾心機落去。d搞笑歌詞,唔係求求其其,歌詞到肉得黎又押韻,拍得住80年代既EYT金像獎頒獎典禮。造型都算一絲不苟,而且扮邊個諗過度過,貼近娛樂圈最新鮮hot news,又唔淨止扮本地藝人,會扮Lady Gaga同Wonder Girls等,擺明唔想只係走屋邨師奶得啖笑路線。三個男主角扮女人多過男人,又假髮又假眼睫毛都咪話唔煩呀。每集又加插藝人扮野環節,都有好多驚喜,欣宜扮徐子珊真係幾似。

咁阿姐又響度做咩呢?  第1集大家笑到碌地時,佢無端端走出黎唱首萬水千山總是情,點先?  之後再要加碼唱多首,係咪想大家提早轉台?  而佢間場時既MC tasks,講到背稿咁,又想懶係鬼馬,搞到變咗四不像。到第2集,唔知TVB係察覺唔對路定汪阿姐真係唔舒服,竟然冇佢份唱歌喎,成個show當堂smooth哂!

到前日呢集,個問題又出現喇!  成個show基本上有四份一part係名曲滿天星2!  汪阿姐唱我的驕傲,一句:I'm "proud" to fly up high....  幾近粵曲腔,果一下我真係不其然打了一個冷震。講真我不嬲都覺得阿姐既唱功,演技,同司儀口才都只係屬二線貨色,做得阿姐只係因為佢既資歷同堅守做事原則令人服佢,但希望佢真係唔好再在佢一些弱項上顯醜。

另外TVB又係要鬧,次次搞新節目,從無考慮鎖定一個target group,乜都要大眾化最好姨媽姑姐細路哥都鍾意睇,既然今次節目扮得咁多後生仔鍾意既外國偶像,咪鎖定俾後生睇囉。你扮Lady Gaga d嬸嬸們大多數都唔知你扮乜水,又點會覺得好笑,扮徐小鳳就差唔多。
再唔諗下計搞搞阿姐個定位,莫講「荃軍覆沒」,
「全軍覆沒」都不遠矣呀!!



3 comments:

狂徒誌 said...

愚弟意見,呢套嘢最令人失望,反而係阿姐,表現確實走晒下坡,同福祿壽簡直格格不入。

Anonymous said...

我聽到呀姐唱我的驕傲.. 真係頂佢唔順.
嘔心~

TT said...

其實搵江欣燕做得唔得呀, 肯定笑死!!