BVB 13隊員雲集的一晚

BVB隊終於在二月有自己既波衫喇!

雖然之前跟其他隊對疊都有著過，但可以齊集13個隊員一齊著住波衫打場波，本來以為好難實現，但大家都好有心，終於3月5日晚可以全隊隊員一齊亮相，開開心心打場友誼波!

在更衣室已經好興奮

影張自拍先，丁字腳

泰國紅衫軍如果唔夠衫可以問我地借

哈，兩位TT

囂到

Dad & Son

好喇，齊人啦!  佳麗一字排開

左起：1號TT、2號Dicky、3號細昌、4號Keith、6號杜Sir、7號周生

10號Lawrence、11號叉燒、12號Tommy、14號阿祖、15號Desmond、16號Ray、18號Jacky

例牌隊相，Yeah!!

開波喇，可能大家其實都係一隊，知道個個打成點，

所以來回球勁多，一分要打好耐呢 !!

最後BVB唯一女Fans WC專程放工趕黎打氣

真係好感激各隊員撥冗出席，呢晚好開心，希望好快大家又可共聚一堂!

BVB rocks!!

80年代「港中女」代表 ─ 楊門女將

近排星期二檔案「中女自白」熱爆，個個喺度講訪問中Queenie一句"豪俾你"好型，乜Jenny呢個97落選港姐醜左咁多，Winnie個樣有d惡頂等等，好不熱鬧。今日蘋果C1講導演于仁泰諗住集齊當紅五旦鞏俐、章子怡、周迅、湯唯、同楊紫瓊開拍《楊門女將》，令我諗起細細個時好迷既電視版楊門女將，堪稱集當時得令既中女於一身既劇集。

TVB既《楊門女將》係1981年首播，以當時人氣高企既阿姐汪明荃飾演既穆桂英為首，率領一眾老中青女演員擔當演出。除阿姐外，我印象最深刻既係成日拎住個"權仗"既老太婆湘漪，其一副鞋抽臉加埋唔出聲都凶到你面青既惡相，真係爛佬都要忌佢三分。另外一個係睇落幾「型仔」既馮寶寶，80年代既TB可能都會唔多唔少抄下佢既造型。至於其他角色其實印象不深，只記得9姊妹中，最大到第七既叫「娘」(如楊六娘)，第八第九就叫「妹」，點解咁分呢下? 點解個分界線要係between七同八呢?  當時細個唔明，而家諗諗下，應該係個八妹未嫁卦??

當年《楊門女將》好睇之處在於好多「場口」都係成班女人集埋一齊商討對策，點樣打番邦啦，點樣解決家中糾紛啦，兒女私情啦，你一句我一句非常過癮。當時冇好似宮心計或溏心風暴式既夾硬搵交黎嗌，個個講野有紋有路有見有地，呢D先叫真正既「中女」架嘛。雖然講做戲個個交足貨，但功架就真係差強人意，揮刀弄劍雞手鴨腳，搞笑居多。

于導演大可在新戲加插楊門奶媽戲份，

由鞏俐訓身演出

盡我所能數

後排左起：李琳琳、A、B、鄭少萍、羅蘭、夏雨、阿姐、C、D、白茵、曾慶瑜

前排左起：馮寶寶、湘漪、E

(請好心人幫忙填上A-E，想睇大D張相可去 http://hk.apple.nextmedia.com/template/apple/art_main.php?iss_id=20100304&sec_id=462&art_id=13783633)

最後奉上《楊門女將》主題曲，以前一聽阿姐唱 "英姿煥發......" 即刻仆去電視機架

泰難忘之旅 - Day 1

好喇，真係乜都抖夠喇，騰騰震係時候再發市喇!!!

今年農曆年難得一班朋友夾到時間，所以決定成班柴娃娃一齊去泰國BKK旅行。其實呢次旅行可以搞得成都唔係容易，因為早於11月我地已經四出撲飛撲房，但都搞左一輪先至搵到各人均感滿意既套餐，而且費用要成4千6，比起平日千幾二千蚊就出到飛真係爭成截呀，不過過年旅行實係咁，最緊要盡興姐!

講返出發當日2月12日年廿九，由於起飛時間實在太晏，喺慌死蝕底既心態下我地決定早D到機場，實行提早感受呢個旅程，所以夜晚7點既機我地3點半就去到喇。由於唔算多出門，所以今次係我第一次用Terminal 2 check-in，感覺幾新鮮喎。

浪人FT

響機場閒逛幾粒鐘，又係時候上機喇，呢班機都幾準時，7點鬆d就開始郁喇!

出發喇 DL/FT/TT

其實BKK對我黎講唔算陌生，呢幾年都去過好幾次，所以你話好大新鮮感其實就冇，不過今次同一班唔同既朋友去，又係同蕃茄第一次去，所以感覺都幾特別架。

Welcome to Bangkok!

酒店係位於蒲區Sala Daeng附近的Glow Trinity，

講大就唔大，但整齊乾淨又就腳

床照 ─ 張床夠哂大

在酒店梳洗一番後，其實都接近11點，喂好鬼肚餓呀，食乜好呢咁夜?  呀，大家即刻諗到DJ Station出面既海南雞飯小店。呢間舖頭其實出名在真係正正響Member蒲點DJ Station出面，D人跳完玩完都好興響出面呢間雞飯店醫肚，順便睇下大家既真面目。我地今次齋食冇蒲，算幾另類，哈!

見到D雞都流哂口水

其實如果PP出面有間咁既野唔知會點

起勢咁加料，我加我加

食飽飽，一行人已急不及待促進泰國經濟，立刻「濕平」。去到泰國呢d二月都卅幾度既國家，背心短褲真係人見人愛，所以一眾靚男唔理夜麻麻起勢咁買背心兼講價，實行買唔到平野唔返酒店!

買住D算啦，聽日去翟度翟呀!

新春頭Wing Wing

其實泰國之行尾聲已經有幾聲咳，到上機返港嗰日，已經頭暈暈冇乜胃口，到香港時機場得9度，我又著得一件tee同薄褸，所以攝下攝下攝親，返到屋企成身一時滾一時凍，非常酸痛，第二日睇醫生原來燒到102度，訓足兩日而家叫好番D。

雖然放假先黎病好鬼唔抵，不過都慶幸旅行尾聲先發病，算係咁啦。泰國之旅遊記稍後奉上。

歲晚收爐

返埋今日工，春節假期正式開始，初九先要開工，呢個假期可算「悠長」。

明日去泰國旅行，將會跟排球友一行八人去，浩浩蕩蕩，唔理三七二十一玩佢夠本，要盡慶而歸。

希望大家虎年一D都唔苦，日日開心，身體健康，心想事成! 

一圖兩用 ─ 心想事成 + 情人節快樂

柴娃娃團年飯

週日約咗一班朋友暨舊同事聚舊團年。呢班朋友其實係我98年時做第一份工時認識既，唔知大家仲記唔記得香港電訊既互動電視服務呢?  我地就係喺呢度做CS架喇，當時一齊上training，可能大家都係剛大學畢業，年紀相若，所以迅速熟起來。雖然我只做咗一個月，但之後不斷都有gathering聚下，眨下眼大家就十幾年朋友喇。

今次團年飯既地點係SL屋企，我地叫左d壽司及家常小炒，實行中日混合賀歲晚呀。

擺到一枱都係呀!

中日cross-over ─ 壽司加沙薑雞

飯後仲有甜品 ─ 芒果蛋糕

好喇，食到飽飽，有咩好做呢?  當然玩下Game呢，自從若干年前自家發明搶錢冚棉胎後，差唔多所有game都加入搶錢元素。今次我哋玩搶錢豬，唔好以為好"輕kang"，其實都會玩到心跳加速標哂冷汗架，玩法其實同7級豬冇分別，不過instead of摸鼻，儲齊4隻既人要響中間個pool度拎一個銀仔，而其他人見狀亦都要鬥快搶銀，當然銀仔數目係預少一至兩個，如搶唔到就要加一級，唔同級既人唔可以傾計架，唔係就低級既豬會「升呢」至高級豬既級數，我就係咁無啦啦升為六級豬 (其實只輸過一次)。

玩到筋疲力竭後，大家都坐定定睇超級巨聲「大結局」，冠軍選左係來自大陸既王雯，佢係唱得好既，但其實自從加入咗大陸參賽者，我對超級巨聲既熱情減卻咗好多，因為覺得變咗冇乜代表性，始終要成為香港一個超級巨星點都要識D廣東話卦?  同埋可唔可以整一集係鬥唱本地經典金曲呢?  相信觀眾會有更大共鳴感。

最後祝大家新一年更上一層樓，開開心心啦!

求求其其審死官

你鍾意睇認認真真有深度既話劇多D，定係胡胡鬧鬧爆吐喪笑(D演員喎)既話劇多D呢?  如果你係後者，由盧海鵬同朱咪咪演既審死官必定係你不二之選。

話說友人Fun之前一晚已經睇左首場，評語可謂麻麻，所以某程度上我已經有準備帶什麼心情去睇呢套戲。套戲在新光戲院上，我從來都未去過，所以呢個都係我決定買飛既原因之一。當日放工便仆到去北角，我五年前曾經喺附近返工，所以今次特登去嗰時好鍾意幫襯既強記食飯，呢間舖頭既叉燒煎蛋飯好出名架。

新光戲院，成日話拆，所以好想去睇一場戲

強記叉燒煎蛋飯，出名到有線稿專題報道

同張相有少少出入喎

之後去好出名既舖頭買雞蛋仔，條龍由朝到晚都喺度架喎

好喇，7點半喇，約左"分飛燕"友人ＤＷ攞飛。ＤＷ係呢套劇既宣傳，所以搵佢攞飛實有靚位，而另一最大"著數"係可以乘機叫佢帶我入後台同我最鍾意既咪咪姐&樊奕敏影相! 

我同咪咪姐襯唔襯呀?

樊奕敏呀，91最上鏡小姐，嗰時勁LIKE佢

同樊奕敏影相時，有以下搞野對白：

DW: 喂Amy, 有個小朋友想同你影相呀

樊: 好呀!

我: 好靚呀你Amy

樊: 多謝

DW: 佢係港姐DATABASE黎架。

樊: 嘩，唔記得我邊年選得架喇! (哈哈哈)

DW: 佢實記得啦，佢年年既帶都有呀。

樊: 係咪架，咁你可唔可以COPY一隻俾我呀，我講真架!

我: 當然得啦! (兩人又哈哈大笑)

好喇，寒喧一場，又係時候入場喇。我地坐第4行，仲要係中間路位，好清楚呀!

入場喇

袁詠儀都有送花牌喎，乜唔係同張智霖一齊送既?

個佈景搭得好簡單

成套戲包括劇情甚至對白都同周星馳既電影版大同小異，最多加插左一D諷刺時敝既對白，創意幾乎係零。各演員既演出亦都好參差，基本上冇乜演技可言，胡胡鬧鬧得啖笑，唔記得對白爆肚等等不在話下，李麗霞(黑妹)直情由頭到尾冇講過一句完整對白，淨係識笑笑笑，好似俾$360入黎睇佢笑咁!  臨尾一幕樊奕敏要"長跪"公堂，可能好悶係咁玩佢既假BB，搞到DRAW哂D ATTENTION，唔係咁好囉我覺得。不過朱咪咪有幾幕數白欖加RAP，雖然都有甩漏，但咁長又快既台詞佢HANDLE得算幾好，論表現應該係全場第一!

終於捱左3個鐘，謝幕喇

甘草王王俊棠，勁LIKE佢呀

 如欲睇友人FUN對此劇既意見，可去呢度望望，如有雷同實屬巧合。

星期六，向道德塔利班說不

明光社，今個星期六賣旗。

你可能會認同或某程度認同佢既立場，但究竟呢種立場係咪對整個社會在道德上及互相包容尊重上係好事，值得商確。

假借宗教名義，欺壓小眾，還口口聲聲造福社群，你又會透過賣旗籌款這玩意直接地助紂為虐嗎?

如你還未認識明光社，可從此link看看壹週刊專訪其"社長"!

性戰沙皇蔡志森

星期六，全民起義，向道德塔利班說不!!!!

(加按: 原來係2月13日下星期六先啱, 對唔住大家)

表妹結婚喇

恭喜哂表妹上週六做咗個靚靚既新娘子！

由於唔想著西裝，所以當日臨急臨忙買恤衫買西褲買鞋買褸，成身新簇簇去飲表妹個餐。婚宴設於北角區新起既酒店Harbour Grand HK，故細佬駕車都兜咗少少路，錯過咗表妹簽字儀式。

去到時已經被一對大投影蝴蝶吸引，好有氣勢呀。

一對新人在宴會廳出面同賓客合照，

出面個景靚呀

婆婆好感觸，流下喜悅之淚

新郎哥應該係童軍領袖，所以有班童軍綵排儀式，

新郎新娘將會在這些木棍下穿過，幾好玩喎

未入席影張相先啦

女家合照，成30幾人，排位都排一輪

 企定定影喇

菜式方面都係囍宴食慣食熟，雖然水準幾好，但係起菜速度極慢，我地嗰枱等到9點半先起第一碟菜，好肚餓呀! 不過今日咁高興等多陣都冇所謂，傾下食下不知不覺食到11點半，大家都好滿足咁離開。

冇機會單獨同一對新人影，惟有搵紙板頂住先啦，嘻

通宵K原來很可怕

週五晚BVB打了一場競爭激烈既波，當中隊員DL不慎跌親，眾人均十分擔心，並以為緊接既唱K環節會取消。點知DL不單止唔縮沙，仲興致勃勃一定要去，我惟有帶住一副"攰偈"捨命陪君子啦。

唱K地點為旺角中心，時為11:45pm，記憶中已有5年以上冇試過咁夜唱K。我地一行5人被編入一間三尖八角兼少少殘舊既細房，頗為逼夾。由於我遲入房關係，去到時個點唱LIST已被一眾K魔點了4頁，登時為之氣結。DL更加一洗平時斯文形象，好似上左身咁狂唱狂UN，令人歎為觀止。

五人大波袋被屈埋一角

傷者DL慘遭我及CF蹂躪

四大靚聲組 ─ DL/CF/JL/SAY

當眾人玩到3點幾勁high勁亢奮時，我既四肢已經不斷發出警號，又酸又痛，呵欠頻頻，卒之在4:15am宣告失守，要立時鬆人。可憐的我以為飛的返屋企可以快快覺覺豬，點知返到屋企先醒起漏左一袋衫響K房，而呢套衫又要第二朝一早拎去改準備聽晚去表妹的結婚晚宴，所以再以的士來回飛，真係跌錢捱眼瞓，好慘呀!   經過是次慘痛經歷，你話通宵K係咪好可怕呢!