小驚喜

今晚返到屋企，蕃茄俾咗個小驚喜我，雖則唔係咩大禮，但份心意令人好窩心呢!  仲有張咭喎，當然內容不便公開啦!  wahahahah

謝謝您!

天佑BKK

突然間，519呢個數字，可能跟64一樣令人「不想回憶、未敢忘記」!

擾攘兩個多月既泰國紅衫軍示威，隨著多個紅衫軍領袖於5月19日宣布投降，本以為事件可以告一段落，人民可以重新振作，重建家園。點知................

部份暴徒唔忿氣，響曼谷四處地標肆意破壞，首當其衝既當然係幾個令泰國人引以為傲既大型現代化商場!  Central World (即World Trade)慘成戰耙，被狂徒縱火焚毀，全座商場幾乎燒通頂，就咁樣壯烈犧牲。而鄰近的Siam Paragon等商場亦被波及。

我都留過不少腳毛響呢個咁美麗既Mall!  基本上每次去BKK，都例牌會黎呢度行下。行呢個商場其實係一種好relaxing既experience，因為人唔多，可以無拘無束 (或漫無目的)咁行，店舖食肆又齊全，包有你啱食啱睇既地方。每次去都令我感覺好似以前在加拿大行Mall一樣，好舒服。

最記得有一次我同一班朋友響Central World近頂層既 Triple O's食lunch，全場差唔多得我地一枱人，我地成班嘻嘻哈哈傾左成兩粒鐘，冇人望你冇人jip你，好爽!

翻查資料，原來Central World前身World Trade於1990年開幕，至2002年由Central Group收購，易名為Central World。2006年完成擴建工程，增加55萬平方米空間。真係估唔到擴建4年後就壽終正寢，十萬個可惜呀!

聖誕時的Central World，竟然俾到人一種冬日感覺喎

因為香港伊勢丹執咗九世，所以去到我實行返夠本架

一年容易又港姐

雖則我有個姊妹Site「港乜姐」日日緊貼港姐最新消息，但始終係報道形式，自己意見唔算多，所以都好想係呢邊寫下今年港姐。

港姐呢壇野其實越做越惡搞，觀眾冇興趣，收視又不濟，舊年仲話質素大淪陷，搞到死得咁濟。但唔做唔做仍需做，今年惟有大改革放寬年齡上限到27歲，非三粒星又可以玩，成個港姐變得好「河蟹」。

開初我都唔睇好，咁搞法好似將港姐一直堅守既原則都要迎合市場去轉，咁其實同亞姐冇乜分別。但呢幾日睇下d參選者質素，又好似係好咗。連何麗全都話因為質素太好而決定增加名額到15個 (佢年年都咁講，但冇一次真係咁做!)，估唔到呢招確係奏效，雖則話當中唔知幾多係受惠於"條例放寬"，但始終今年冇俾人寫到一文不值，算係咁。

以下呢幾個係我so far心水，希望醒醒定定啦!

Sweet版鍾麗淇

夠大方，觀眾緣好

串咀Barbie

講樣係好啦，不過改個咁既名，要扣分!

港版蕭亞軒

幾有性格，有機跑出

其他佳麗芳容可參閱以下連結

2010年港姐首輪PK戰

2010港姐PK戰 - 加時戰!!!

2010港姐第二輪面試 ─ 質素提升

投票投票

近期Hit爆問題，5月16日你投唔投票呀?

本來都唔想響個blog特別講呢樣野，不過見到近日FB朋友既留言，令我有必要在這裡澄清下。

其實是次補選，著重唔係候選人，而係議題本身。

話說政府不斷宣傳大部份港人都希望循序漸進落實普選，但當年基本法講明最快07/08可落實，但04年人大釋法，話唔可以咁早，咁即係點?  即係可以講過唔算數，大家信心盡失。佢話17/20年可落實普選，到時又唔知係咪真架姐。

但現時無機制可以俾港人表達我地對普選既渴求，咁點算呢?  所以一班泛民人士，諗出用五區呈辭，來讓市民表達佢地係咪想爭取普選。你投返果個辭職議員，即係表示想爭取普選，唔係既話即係唔認同囉，就係咁簡單。

雖然我都覺得呢條橋有少少屎，但都係冇辦法中既辦法，我始終會透過呢次選舉表達我既渴求，因為呢次機會唔係有好多次!  但竟然FB上好多朋友扭曲，有朋友連大陸係咪應該普選都拎埋出黎講，更有朋友如潑婦罵街地說你想香港死就去投票啦!  言論冇POINT又侮辱，既然大家有自己立場，咪堅持自己己見囉!  你唔投票冇人話你，我去投票就咪鬼嘈生哂啦，唔係你話一句幫小丑打冧香港我就唔去投架喎，咪當人既思想係流先得架!

唔理咁多，今日一定去投票，講完!

又準又特別的心理測試

朋友send來youtube一個日本人做的心理測試。片中測試員扮成客席教師，在不同血型的幼稚園學生前裝作打爛花樽，睇睇小朋友的各種反應，以測試不同血型是否會對小朋友的性格有影響。

片段如下：


睇完之後，我很驚訝測試既準確性，身邊朋友及家人均可大約以這測試分類唔同性格，仲準過分星座呀!  我曾經見過兩次工，面試前都需要填上血型，初時都R哂頭唔明點解要填，而家知喇!  呵呵!

泰溫馨

近日友人因肺部問題多次進出醫院，經多番檢測後仍未能搵出病因，故近日需要再次入院開刀抽取肺部組織化驗。昨晚一行八位朋友便到法國醫院探下佢，同佢解下悶。但竟然一位朋友誤將銅鑼灣的聖保祿醫院當為法國醫院，去到先知搞錯，要急急趕的士過返黎。雖則聖保祿醫院前身好似真係叫法國醫院，但九龍呢間都成十幾廿年，仲搞錯確係離奇。

我地眾人先約在大堂等候，一上到病房見到呢位朋友，嘩成個人落哂型，本來面圓圓成個波咁既佢，變到塊面凹哂成個肚冇左張枱咁，真係見者心酸。插住多條喉管既佢把聲好弱，我都好勉強先聽到佢講既野。而大家都好有心，不斷同佢傾計講下笑咁，務求令到個氣氛輕鬆D，所以講下笑下都探咗成個半鐘先鬆人。

探完病都九點鐘，眾人都嗌肚餓。法國醫院位近九龍城，而九龍城又出名泰國野，既然泰國而家立立亂冇得去，我地就食泰國野當解下「鄉愁」啦。今次試既係"同心泰國菜館"!

餐廳位於公園側邊，好易搵

眾人極餓，狂點餸

好想試呢D咖喱麵包，但最後冇點

串燒雞牛

拼盤有我最like既蝦餅

豬頸肉 ─ 唔肥喎，ok喎

海南雞飯 ─ 好似DJ Station出面好食D喎

珍多冰，甜到呢

炒菜苗

冬蔭公 ─ 色水唔靚但飲落又Ok喎

Pat Thai ─ 死啦，我發覺我越黎越麻麻食 Pat Thai

JC企咗響病房兩粒鐘，攰到陰公

是日食到10點半散Band，希望下次臥床友人可以精神奕奕再join我地食過啦。

新派齋菜三德

BVB老大之一RC剛剛牛一，佢建議食齋，所以一諗就諗到呢間位於佐敦既「三德素食館」。

其實我一直對齋菜都甚為抗拒，可能觀念仲徘徊喺食齋等於將一舊舊麵粉或芋頭塞落肚，所以從來冇諗過將齋舖列為我常去餐館之列。但去年友人帶我去食呢間齋舖後，對食齋完全改觀，原來食齋都可以有咁多不同烹調煮法，絕對唔會悶，而口感亦可媲美食肉，非常奇妙。

三德素食館為於佐敦JD Mall，呢個商場大家可能會感到陌生，但佢既前身可謂係香港人都記得，而聽到個心亦會「離一離」既嘉利大廈。1996年呢座大廈發生世紀大火，當中救火畫面實在瀝瀝在目。火災後成幢黑忟忟既大廈都仲屹立佐敦10年，直至2006年成件事Closed File先拆得，後改建為此商場，當然呢10年間亦傳出唔少鬼故事。八八卦卦既一班波友知道要去呢度食飯，都話有少少驚喎，搞到席間去廁所要約埋一齊去，寧捨多事。

JD Mall專登採用全玻璃設計，就算升降機都

可以望到出面，讓人不會覺得太陰森

三德係邊三德呢?

睇Menu都覺得正呀

先嚟蟹玉素翅，D蟹玉其實係南瓜囉 

怡香茄子豆腐 ─ 賣飛佛 

XO醬翠玉雜菌 ─ D翠玉瓜幾甜 

咕嚕肉 ─ 同真實嗰D口感一樣喎 

五柳鮮班 ─ 阿姐快手得濟已切一刀 

蓮藕餅 ─ 呢個豎起手指公呀，D汁好得 

松子炒飯 ─ 松子少到呢

椒鹽蠔仔脆豆腐 ─ 好惹味，D蠔整到有蠔腥味先好  

雲吞鮮竹菜苗 ─ 我覺得一般

最後見爭少少叫咗一打炸饅頭

愛上鏡既TCHU同一眾友人

食得七七八八，一眾人士見唔夠喉，走去隔離「糖伯府」食糖水。呢間糖水舖主打刨冰，但我嫌D冰太凍，一次都冇試過，主要食其他甜品。我今次叫咗 

楊枝金露豆腐花

DM叫既芒果秋香，好Kawaii呢

眾人食到飽飽好滿足咁離開，返到去仲有時間睇到「精叻辮」喎!

Sergio生日@Sergio

今個月15號係好友Sergio生日，左約右約下終於21號約齊班底一齊同佢慶祝!  之前聽聞銅鑼灣有間意大利餐廳叫Sergio，搞到壽星仔Sergio好想試下，我地一眾戰友當然奉陪啦。

呢間餐廳全名係Sergio Ristorante Pizzeria，喺高士威道8號，近聖保祿學校。我地7點半到達，成間餐廳只得一圍外籍客，頗為冷清。

正門都Grand Grand地架

Sergio餐廳，好特別呢

Sergio新發現，90年香港電視，內有

90港姐介紹

頭盤 ─ D肉幾香

Risotto ─ 濕得滯囉我覺得

Pizza ─ 唔記得影，得一塊!  OK啦

是日焦點 ─ Fun親手整既Mascarpone Chocolate Cake，

好味道呢，尤其個餅底呀!  正!

生日快樂呀Sergio!

總括黎講呢間餐廳食物水準一般，以呢個價錢俾分實屬唔合格!  而佢地既Try-to-be-nice service都要打大交叉。環境方面，友人FUN不斷彈冷氣唔夠，不過佢熱底呢!

左耳耳嗚

大家會唔會因為鼻塞或長期打乞嗤而搞到耳仔聽唔到野呢?

我會!

我周不時因上述問題以致耳仔(尤其左耳)會聽唔到野。其實當然唔係真係完全聽唔到野咁誇啦，個情形就好似你沖涼洗頭出黎D水"鯨"咗響耳仔咁樣，聽既聲音會比較矇咁囉。

之前呢個問題每次出現都只係維持數小時，但今趟已經維持幾日，已經嘗試捏住個鼻逼D氣出黎或大呼小叫吞口水都無法根治，我懷疑係耳內肌肉有d移位，今次真係要睇醫生喇 >_<

荃加福祿壽 ─ 荃軍覆沒

睇咗三集「荃加福祿壽」，好想問：「究竟汪阿姐個定位係咩呢?」

首先唔講阿姐住，其實成個節目笑位係有，當然你唔好expect由頭笑到尾，但睇得出搞笑環節係幾多元化，而且係有俾心機落去。d搞笑歌詞，唔係求求其其，歌詞到肉得黎又押韻，拍得住80年代既EYT金像獎頒獎典禮。造型都算一絲不苟，而且扮邊個諗過度過，貼近娛樂圈最新鮮hot news，又唔淨止扮本地藝人，會扮Lady Gaga同Wonder Girls等，擺明唔想只係走屋邨師奶得啖笑路線。三個男主角扮女人多過男人，又假髮又假眼睫毛都咪話唔煩呀。每集又加插藝人扮野環節，都有好多驚喜，欣宜扮徐子珊真係幾似。

咁阿姐又響度做咩呢?  第1集大家笑到碌地時，佢無端端走出黎唱首萬水千山總是情，點先?  之後再要加碼唱多首，係咪想大家提早轉台?  而佢間場時既MC tasks，講到背稿咁，又想懶係鬼馬，搞到變咗四不像。到第2集，唔知TVB係察覺唔對路定汪阿姐真係唔舒服，竟然冇佢份唱歌喎，成個show當堂smooth哂!

到前日呢集，個問題又出現喇!  成個show基本上有四份一part係名曲滿天星2!  汪阿姐唱我的驕傲，一句：I'm "proud" to fly up high....  幾近粵曲腔，果一下我真係不其然打了一個冷震。講真我不嬲都覺得阿姐既唱功，演技，同司儀口才都只係屬二線貨色，做得阿姐只係因為佢既資歷同堅守做事原則令人服佢，但希望佢真係唔好再在佢一些弱項上顯醜。

另外TVB又係要鬧，次次搞新節目，從無考慮鎖定一個target group，乜都要大眾化最好姨媽姑姐細路哥都鍾意睇，既然今次節目扮得咁多後生仔鍾意既外國偶像，咪鎖定俾後生睇囉。你扮Lady Gaga d嬸嬸們大多數都唔知你扮乜水，又點會覺得好笑，扮徐小鳳就差唔多。

再唔諗下計搞搞阿姐個定位，莫講「荃軍覆沒」，

「全軍覆沒」都不遠矣呀!!